Bien me deüsse targier
De canchon faire et de mos et de cans,
Cant me covient eslongier
De le meillour de toutes les vaillans,
Si en puis bien faire voire vantanche,
Ke je fas plus, chertes, ke nus amans,
Si en sui mout endroit l'ame joians,
Mais dou cors ai et pitié et pesanche.

On se doit bien esforchier
De Deu servir, ja n'i soit li talans,
Et le car fraindre et plaissier,
Ki tous jours est de pechier desirans ;
Adont voit Deus le double penitanche,
hé, las ! se nus se doit sauver dolans,
Dont doit par droit me merite estre grans,
Car plus dolens ne se part nus de Franche
Vous ki dismés les croisiés,
Ne despendés mie l'avoir ensi ;
Anemi Deu en seriés.
Dieus ! Ke poront faire si anemi,
Cant tuit li saint trenleront de dotanche.
Devant chelui ki onkes ne menti !
Adont seront pecheour mal bailli,
Se se pitiés ne cuevre se poissanche.

Ne ja por nul desirier
Ne remanrai chi avuec ches tirans,
Ki sont croisié à loier
Por dismer clers et borjois et serjans ;
Plus en croisa covoitiés ke creanche.
Mais chele crois ne lor iert ja garans,
A nul croisié, car Deus est si poissans
Ke il se venge a peu de demoranche.

Li keus s'en est ja vengiés
Des haus barons ki or li sont failli.
C'or les voussist empirier
Ki sont plus vil ke onkes mais ne vi.
Dehait li ber ki est de tel sanlanche
Com li oisiaus ki conchie sen ni !
Peu en I a n'ait sen regne honi,
Por tant k'il ait sor ses homes poissanche.

Ki ches barons empiriés
Sert sans eür, ja n'avra tant servi
K'il lor en prende pitiés ;
Por chou fait bon Dieu servir, ke je di
K'en lui servir n'a eür ne cheanche :
Ki bien le sert, et bien li est meri.
Pleüst a Deu c'Amours fesist aussi
Envers tous chiaus ki en li on fianche !

Or ai jou dit des barons sanlanche ;
Se lor en poise, de chou ke je le di,
Si s'en prendent a men maistre d'Oisi¹
Ki m'a apris a canter des enfanche.