Du bouchier dabeuile Du boucher d'Abbeville

Segnour oies vne merueille
Conques noistes sa pareille
Que ie uoel dire et conter
Or metes cuer a lescouter
Parole qui nest entendue
Sachies quele est enfin perdue
A abeuille eut .i. bouchier
Que si uoisin eurent molt chier
Nestoit pas fel ne mesdisans
Mais cortois sages et uaillans
Et loiaus hom de son mestier
Et sauoit souent grant mestier
Ses poures uoisins soufraiteus
Nestoit auers ne couoiteus

Entor feste toussains auint
Ca oisemont au markiet vint
Li bouchiers bestes acater
Mais ni fist fors uoie gaster
Trop I troua kieres les bestes
Les cochons felons et rubestes
Felons et de mauuais afaire
Ne puet a iaus nul markiet faire
Pourement sa uoie emploia
Conques denier ni emploia
Apres espars markie sen torne
De torst errer molt bien satorne
Se cape porte sur sespee
Et pres estoit de la uespree
Oiies comment il esploita
Droit a bailluel li anuita
En mi uoie de son manoir