La dame qui son fils conçut
l'ot droit au jor c'avoir le dut
et saciés c'a tel eure l'ot
c'onques nuls hom fors Diu nel sot,
et fu li plus tres biele riens
c'onques veïst hom terrïens,
si l'apielerent Diudonné
por ce qu'issi l'ot Dius donné ;
puis fu nommés el baptestire
Eracles, ensi l'oï dire.
Au tierç jor qu'il fu baptisiés
li vint une briés trestous ploiés ;
Dius nostre Sire li tramist
par le saint angle qui le mist
sor le berçuel u il gisoit.
Li letre par defors disoit
c'on mesist cel enfant a letre
quant eure et tans seroit del metre.
Encor ot defors autre cose :
que la dame ne fust tant ose
que desploier laissast le brief,
mais, sor les deus ius de son cief,
fust bien gardés et en sauf mis
tant que l'enfens fust si apris
qu'il le peüst espondre et lire,
et lors li baillast on se cire.
La dame saut sus de son lit,
les letres prent et si en list
tant seulement que lire en doit,
çou est çou que dehors pendoit ;
le brief estoie maintenant ;
or voit que Dius a cier l'enfant.
norir le fait molt ricement ;
quant il a cinc ans plainemont,
mis est as letres li petis,
mais ainc ne fu teuz aprentis,
son maistre au cief de l'an aprent ;
ne se fait laidengier ne batre.
Li mere quel voit tant sené
l'a devant un autel mené,
le brief lui tent, cil le desploie
et si le list s'en a tel joie
que nus ne puet grignor avoir,
car Dius li a fait assavoir
qu'il ert de femes connissieres
et canque valt cevaus ne pieres
savra, tels sera se merite,
par Diu et par saint Esperite
Quant il ot tout le brief leü
de kief en kief et porveü,
toutes les pieres connissoit
de quel vertu cascune estoit ;
de femes savoit ensement
toute la vie et l'errement,
et quels cascune estoit el point
(qu'il le veoit n'en doutoit point),
et des cevaus resavoit il
li quels valoit mius entre mil.