Adan d'amour, vous demant
Que m'en dichiés sans cheler
Dou quel purent plus trouver
En amour li fin amant
Ou du bien ou du mal ; vous le devés
Mout bien savoir, car esprouvé l'avés.

Sire, je voi l'un dolant,
L'autre lié de bien amer ;
Mais je m'en doi blasmer,
Car j'en go et nepourquant,
Comment que faite en soit me volentés,
Li maus plus que li biens I est trouvés.

Adam, a guise d'enfant
Me respondés, c'est tout cler.
On n'i puet tant endurer
De maus, che sevent aucquant,
C'uns tous seus biens n'estaigne les grietés
C'on a senti ; li biens pert plus assés.

Sire, amans en soeffre tant
C'on en voit maint desperer ;
Trop chier voit on comperer
Deduit et riqueche grant
Et d'autre part chascuns n'est pas amés
Qui a les biens d'amour chier comperés.

Adam, tout li plus souffrant
Dou pis c'amours set donner
N'en veulent mie saner ;
Dont est il bien apparant
Que li biens est assés plus drus semés,
Car maus qui plaist ne doit estre contés.

Sire, Amour trouvai quisant,
Quant je le soloie anter,
En villier, en desirrer,
En penser et en doutant ;
Mais point n'estes d'amour bien embrasés,
Pour chou n'i cuidiés point tant de durtés.

Ferri, on trueve lisant
Que tant de mal n'a pas li condampnés
Con a joie ichil qui est sauves.

Grieviler, en aquerant
Est chascuns plus traveilliés et penés
Qu'il ne soit au despendre reposés.