[ ... ]
Et la chalendre la Sequenche ;
Tout li autre oisiel ensement,
Haut, moiienement, bassement.
La ot .X. tans grant melodie
Que je ne vous conte ne die.
Li merliers a lut l'Ewangille :
Onques, ne a chans ne a ville,
N'oï chant plus melodieus,
Plus plaisant ne plus grascieus.
Le Credo après commencha
Li rousseignos, si s'efforcha.
Tout li autre oisiel boinement
Chantent avuec communement.
Et après chanterent l'Offrande.
Venus au papegay commande
Que briement veulle sermouner
Et de par li pardon douner
A chaus qui sont loyal amant.
"Dame, fait il, a vo commant."
Atant son sermon commencha :
"Tout fin amant, entendeis cha,
Ki joie d'amours atendeis :
A avoir en vous cuers tendeis
.IIII. vertus de mout grant pris,
Par coi amans puet estre apris
Et a perfection venir.
Or les veulliés bien retenir :
La premiere est obedience
Et la seconde pascience ;
La tierche n'iert mie celee :
Elle est loyauteis appelee ;
Et la quarte, c'est esperance ..."
[ ... ]