Segnieur pelerins sui si ai alé maint pas
Par viles par castiaus par chités par trespas
S'aroie bien mestier que je fusse a repas
Car n'ai mie par tout mout bien trouvé mes pas

Bien a trente et chienc ans que je n'ai aresté
S'ai puis en maint bon lieu et a maint saint esté
S'ai esté au sec arbre et dusc'a dur esté
Dieu grasci qui m'en a sens et pooir presté

Si fui en famenie en surie et en tir
S'alai en un païs ou on est si entir
Que on i muert errant quant on i veut mentir
Et si est tout quemun

Li vilains
Je t'en voeil desmentir ·

Car entendant nous fais vessie pour lanterne
Vous ariés ja plus chier a sir en le taverne
Que aler au moustier

Li pelerins
pechié fait qui me ferne ·
Car je sui mout lassés esté ai a luserne
En terre de labour en toskane en sezile
Par puille m'en reving ou on tint maint concille
D'un clerc net et soustieu grascieus et nobile
Et le nomper du mont nés fu de ceste ville ·

Maistres adans li bochus estoit chi apelés
Et la adans d'arras

Li vilains
tres mal atrouvelés
Soiiés sire con vous avés vos aus pelés
Est il pour truander tres bien atripelés

Alés vous en de chi mauvais vilains puans
Car je sai de chertain que vous este truans
Or tost fuiés vous ent ne soiés deluans
Ou vous le comperrés

Li pelerins
trop par estes muans ·

Or atendés un peu que j'aie fait mon conte
Or pais pour dieu signeur chis clers dont je vous conte
Ert amés et prisiés et honnerés dou conte
D'artois si vous dirai mout bien de quel aconte

Chieus maistre adam savoit dis et chans controuver
Et li quens desirroit un tel home a trouver
Quant acointiés en fu si li ala rouver
Que il feïst uns dis pour son sens esprouver

Maistre adans qui en seut tres bien a chief venir
En fist un dont il doit mout tres bien sousvenir
Car biaus est a oïr et bon a retenir
Li quoins n'en vaurroit mie ·v· chens livres tenir

Or est mors maistre adans diex li fache merchi
A se tomble ai esté don jhesucrist merchi
Li quoins le me moustra le soie grant merchi
Quant jou i fui l'autre an

Li vilains
vilains fuiés de chi
Ou vous serés mout tost loussiés et desvestus
A l'ostel serés ja autrement revestus

Li pelerins
Et comment vous nomme on qui si estes testus

Li vilains
Comment sire vilains gautelos li testus

Li pelerins
Or veilliés un petit biaus dous amis atendre
Car on m'a fait mout lonc de ceste vile entendre
Qu'ens en l'onnour du clerc que dieus a volut prendre
Doit on dire ses dis chi endroit et apprendre

Si sui pour che chi enbatus

Gautiers
fuiés ou vous serés batus
Que diable vous ont raporté
trop vous ai ore deporté
Que je ne vous ai embrunkiet
ne que cist saint sont enfunkiet
Il ont veü maint roy en France

Li pelerins
Hé : vrais dieus envoiés souffrance
Tous cheus qui me font desraison

Guios
Warnet as tu le raison
oïe de cest païsant
Et comment il nous va disant
Ses bourdes dont il nous abuffe

Warnés
Oue donne li une buffe
Je sai bien que c'est ·I· mais hom

Guios ·
Tenés ore alés en maison
Et si n'i venés plus vilains

Rogaus
Que c'est mesires sains guillains
Warnier vous puist faire baler
Pour coi en faites vous aller
Chest home qui riens ne vous grieve

Warners
Rogaut a poi que je ne crieve
Tant fort m'anuie se parole

Rogaus
Taisiés vous vvarnier il parole
De maistre adan le clerc d'onneur
Le joli le largue donneur
Qui ert de toutes vertus plains
De tout le mont doit estre plains
Car mainte bele grace avoit
Et seur tous biau diter savoit
Et s'estoit parfais en chanter

Warniers
Savoit il dont gent enchanter
Or pris je trop mains son affaire

Rogaus
Nenil ains savoit canchons faire
Partures et motés entés
De che fist il a grant plentés
Et balades je ne sai quantes

Warniers
Je te pri dont que tu m'en cantes
Une qui soit auques commune

Rogaus
Volentiers voir jou en sai une
Qu'il fist que je te canterai

Warniers
Or di et je t'escouterai
Et tous nos estris abatons

Rogaus
Est ceste bonne Warnier frere

di Warniers
Ele est l'estronc de vostre mere
Doit on tele canchon prisier
Par le cul dieu j'en apris ier
Une qui en vaut les quarante

Rogaus
Par amours Warnier or le cante

Warniers
Volentiers foi que doi m'amie
De tel chant se doit on vanter

Rogaus
Par foi il t'avient a chanter
Aussi bien qu'il fait tumer l'ours

Warniers
Mais c'estes vous qui estes lours
Uns grans caitis loufe se waigne

Rogaus
Par foi or ai je grant engaigne
De vo grande melancolie
Je feroie hui mais grant folie
Se je men sens metoie au vostre [voe]
Biaus preudons mes consaus vous loe
Que chi ne faites plus de noise

Li pelerins
Loés vous dont que je m'en voise

Rogaus
Oïl voir ·

Li pelerins
Et je m'en irai
Ne plus parole n'i dirai
Car je n'ai mestier c'on me fiere [fierche]

Guios
Hé : diex je ne mengai puis tierche
Et s'est ja plus nonne de jour
Et si ne puis avoir sejour
Se je ne boi ou dorc ou masque
Je m'en vois j'ai faite me tasque
Ne je n'ai chi plus riens que faire
Rogaus
Warnet

Warniers
Que

Rogaus
Veus tu bien faire
Alons vers aiieste a le foire

Warnés
Soit mais anchois voeil aler boire
Mau dehais ait qui n'i venra