Marote
Robins m'aime, Robins m'a,
Robins m'a demandee, si m'ara.
Robins m'acata cotele
D'escarlate boine et bele,
A leur i va.
Robins m'aime, Robins m'a,
Robins m'a demandee, si m'ara.

Li chevaliers
Je me repairoie du tournoiement,
Si trouvai Marote seulete au cors gent.

Marote
Hé ! Robin, se tu m'aimes,
Par amour, maine m'ent.

Li chevaliers
Bergiere, Diex vous doinst bon jour!

Marote
Diex vous gart, sire!

Li chevaliers
Par amour,
Douche puchele, or me contés
Pour coi cheste canchon cantés

Si volentiers et si souvent :

Hé ! Robin, se tu m'aimes,
Par amour, maine m'ent?

Marote
Biaus sire, il i a bien pour coi:
Car j'aim Robinet, et il moi;
Et bien m'a moustré qu'il m'a kiere :
Donné m'a cheste panetiere,
Cheste houlete et chest coutel.

Li chevaliers
Or me di, veïs tu nul oisel
Voler par deseure ces cans?

Marote
Sire, oïl je ne sai pas kans.
Encore en a en ces buissons
Et cardonnereul[e]s et pinçons
Qui mout cantent joliement.

Li chevaliers
Si m'aït Dieus, bele au cors gent,
Che n'est pas che que je demant.
Mais veïs tu par chi devant
Vers ceste riviere nul ane?

Marote
Est-ce une beste qui recane?
J'en vi ier .iii. seur che quemin,
Tous quarchiés aler au molin.
Est che chou que vous demandés?

Li chevaliers
Or suis je mout bien assenés!
Di moi, veïs tu nul hairon?

Marote
Harens, sire, par me foi, non;
Je ne vi harens puis quaresme,
Que j'en vi mengier chiés Dame Eme,
Me tante a cui sont ches brebis.
L'en en vent assez a Paris.

Li chevaliers
Par foi, or ne sai je que dire;
Ne doi avoir talent de rire
Onques mais ne fui si gabés!

Marote
Sire, foi que vous mi devés,
Quele beste est che seur vo main?

Li chevaliers
C'est uns faucons.

Marote
Mengüe il pain?

Li chevaliers
Non, mais bonne char.

Marote
Cele beste?
Esgar! Ele a de cuir le teste!
Et ou alés vous?

Li chevaliers
En riviere.

Marote
Robins n'est pas de tel maniere;
En lui a trop plus biau deduit.
En no vile esmuet tout le bruit
Quant il joue de se musete.

Li chevaliers
Or dites, douche bregerete,
Ameriés vous un chevalier?

Marote
Biaus sire, traiiés vous arrier!
Je ne sai que chevalier sont.
Ne de tous les homes du mont
Je n'ameroie que Robin.
Il vient au soir et au matin,
A moi tous les jors par usage.
Et m'aporte de son froumage;
Encore en ai je en mon sain
Et une grant pieche de pain
Qu'il m'aporta ore a prangiere.
Encore en ai je en mon sain
Et une grant pieche de pain
Qu'il m'aporta ore a prangiere.

Li chevaliers
Or me dites, douche bregiere,
Vauriés vous venir avoec moi
Jeuer seur che bel palefroi
Selonc che bosket, en che val?

Marions
Aimi! Sire, ostés vo cheval!
Par .i. poi qu'il ne m'a blechie.
Li Robins ne regibe mie
Quant je vois apres se karue.

Li chevaliers
Bregiere, devenés ma drue,
Et faites che que je vous proi.

Marions
Traiés vous sire ensus de moi:
Chi estre point ne vous affiert.
Comment vous apele on?

Li chevaliers
Aubert.

Marions
Vous perdés vo paine, sire Aubert.
Je n'amerai autre que Robert.

Li chevaliers
Nan, bregiere?

Marions
Nan, par ma foi!

Li chevaliers
Cuideriés empirier de moi,
Qui si lonc jetés me proiere?
Chevaliers sui et vous bregiere.

Marions
Ja pour che ne vous amerai.

Bergeronnete sui mais j'ai
Ami cointe et bel et gai.
µ

Li chevaliers
Bregiere, Diex vous en doinst joie!
Puis qu'ensi est, g'irai me voie.
Hui mais ne vous sonnerai mot.

Trairi deluriau deluriele,
Trairi deluriau delurot.

Hui main quant chevauchoie lés l'oriere d'un bois;
Trouvai gentil bergiere, plus bele ne vit roys.

Trairi deluriau deluriele,
Trairi deluriau luroy.

Marote
Hé! Robechon, leur leure va,
Car vien a moi, leure leure va,
S'irons jeuer, leure doleur va,
Doleur va.

Robin
Hé ! Marion, doleur va,
Je vois a toi, doleur va,
S'irons jeuer, doleureure va,
Dolereure va.

Marote
Robin!

Robins
Marote!

Marote
Dont viens tu?

Robins
Par le saint [Dieu], j'ai desvestu,
Pour che qu'i fait froit, men jupel,
S'ai pris me houce de burel;
Et si t'aport des pommes. Tien!

Marote
Robin, je te connuc trop bien
Au canter si con tu venoies.
Mes tu ne me reconnissoies?

Robins
Si fis, au chant et as brebis.

Marote
Robin, tu ne sés, dous amis—
Et si ne le tiens mie a mal—
Yci fu uns hom a cheval
Qui avoit cauchie une moufle,
Et portoit aussi c'un escoufle
Seur sen poing; et trop me pria
D'amer et poi i conquesta,
Car je ne ferai nul tort.

Robins
Marote, tu m'aroies mort.
Mais se ge fusse a tans venus,
Ne moi ne Gautiers li Testus,
Ne Baudons, mes cousins germains,
Diable i eüssent mis les mains,
Ja n'en fust partis sans bataille.

Marions
Robin, dous amis, ne te caille;
Mais or faisons feste de nous.

Robins:
Serai je drois ou a genous?

Marote
Mais vien cha seoir delés moi,
Si mengerons.

Robins
Et jou l'otroi;
Je serai chi, lés ton costé.
Mais je ne t'ai riens aporté;
Si ai fait certes grant outrage.

Marote
Ne t'en caut, Robin, encore ai je
En mon sain .i. pou de fromage
Et les poumes que m'aportas.

Robins
Diex, com chis froumages est cras!
Ma seur, mengüe.

Marote
Et tu aussi.
Se tu vieus boire, si le di:
Vés chi fontaine en .i. pochon.

Robins
Diex, qui eüst ore du bacon
Ta tante, bien venist a point!

Marote
Robinet, nous n'en arons point,
Car trop haut pent a ses chevrons.
Faisons de che que nous avons;
Ch'est assés pour le matinee.

Robins
Diex, que l'ai le panche lassee
De le choule de l'autre fois!

Marote
Di, Robin, foy que tu mi dois,
Choulas tu? Que Diex le te mire!

Robins
Vous l'orrés bien dire,
Bele, vous l'orrés bien dire.

Marote
Di, Robin, veus tu plus mengier?

Robins
Nennil, voir.

Marote
Dont metrai je arrier
Che pain, che froumage en mon sain
Jusques tant que nous arons fain.

Robins
Ains le met en te panetiere!

Marote
Et vé li chi. Robin, quel chiere!
Proie et commande et je ferai.

Robins
Marote, et je t'esprouverai
Se tu m'ies loiaus amiete,
Car tu m'as trouvé amiet.
Bergeronnet, douche baisselete,
Donnés moi, vostre chapelet.

Marote
Robin, veux tu que je le meche
Seur ton chief par amourete?
M'en iert il mieus se je l'i met,
M'en iert il mieus se je l'i met.

Robins
Oïl, vous serés m'amiete;
Vous averés ma chainturete,
M'aumosniere et mon fremalet.
Bergeronnete, douche baisselete,
Donnés le moi, vostre chapelet.

Marote
Volentiers, ci men amiet.
Robins, fai nous .i. poi de feste.

Robins
Veus tu des bras ou de le teste?
Je te di que je sai tout faire.
Ne l'as tu pas oï retraire?

Marote
Robin, par l'ame ten pere,
Sés tu bien baler du piet?

Robins
Oïl, par l'ame me mere.
Resgarde comme il me siet:
Avant et arriere,
Bele, avant et arriere.

Marote
Robin, par l'ame ten pere,
Car nous fai le tour dou chief.

Robins
Marot, par l'ame me mere,
J'en venrai mout bien a chief.
I fait on tel chiere,
Bele, i fait on tel chiere?

Marote
Robin, par l'ame ten pere,
Car me fai le tour du bras.

Robins
Marot, par l'ame me mere,
Tout arasinc con tu vaurras.
Est chou la maniere,
Bele, est chou la maniere?

Marote
Robin, par l'ame ton pere,
Sés tu fere le touret?

Robin
Ouil, par l'ame ma mere,
Ra il en moi biau vallet
Devant et derriere,
Bele, devant et derriere.

Marote
Robin, par l'ame ten pere,
Sés tu baler as seriaus?

Robins
Oïl, par l'ame me mere,
Mais j'ai trop mains de chaviaus
Devant que derriere,
Bele, devant que derriere.

Marote
Robin, sés tu mener le treske?

Robins
Oïl, mais li voie est trop freske,
Et mi housel sont desquiré.

Marote
Nous sommes trop bien atiré.
Ne t'en caut; or fai, par amour.

Robins
Aten, je vois pour le tabour
Et pour le muse au gros bourdon.

Marote
Va et amaine o toi Baudon,
Se tu le trueves, et Gautier.
Aussi m'aront il bien mestier
Se li chevaliers revenoit.
Robin, revien a grant esploit;
Et se tu trueves Peronnele,
Me compaignesse, si l'apele.
Le compaignie en vaura miex.
Ele est derriere ces courtiex
Si c'on va au molin Rogier.
Or te haste!

Robins
Lais me escourchier.
Saches je ne ferai fors courre.

Marote
Or va!

Robins
Gautiers, Baudon, estes vous la?
Ouvrés moi l'uis, biau dous cousin!

Gautiers
Bien soies tu venus, Robin.
C'as tu qui ies si essouflés?

Robins
Que j'ai? Las! Je sui si lassés
Que je ne puis m'alaine avoir.

Gautiers et Baudons
Di s'on t'a batu.

Robins
Nenil, voir.

Gautiers et Baudons
Di tost s'on t'a fait nul despit.

Robins
Por Dieu soufrez vous .i. petit.
Je sui chi venus pour vous deus,
Car je ne sai ques menestreus
A cheval pria d'amer ore
Marotain; si m'en douch encore
Que il ne reviegne par la.

Gautiers et Baudons
S'il revient, il le comperra!

Baudons
Che fera mon, par ceste teste!

Robins
Vous averés ja trop bonne feste,
Biau seigneur, se vous i venés,
Car vous et Huars i serés,
Et Peronnele. Sont chou gent?
Et s'averés pain de fourment,
Bon froumage et clere fontaine.

Gautiers
Hé, biau cousin, car nous i maine!

Mais vous deus irés chele part,
Et je n'en irai pour Huart
Et Peronnele.

Va don, va!
Et je m'en irai par deça
Vers le voie devers la ville;
S'aporterai me fourke fiere.
Gautiers
Et je men grant baston d'espine,
Qui est chiés Bourguet, me cousine.

Robins
Hé! Peronnele! Peronnele!

Peronnele
Robin, ies tu che? Quel nouvele?

Robins
Tu ne sés? Marote te mande;
Car nous aurons feste trop grande!

Peronnele
Qui i sera?

Robins
Et jou et tu;
Et s'arons Gautier le Testu,
Huart et Baudon et Marote.

Peronnele
Vestirai je me bele cote?

Robins
Nennil, Perrote, nenil point,
Car chis jupiaus trop bien t'avient.
Or te haste; je vois devant.

Peronnele
Va; je te sievrai maintenant,
Se j'avoie mes aigniaus tous.

Li chevaliers
Dites, bergiere, n'estes vous
Chele que je vi hui matin?

Marote
Pour Dieu, sire, alés vo chemin;
Si ferés trop grant courtoisie.

Li chevaliers
Certes, bele, tres douche amie,
Je ne le di mie pour mal.
Mais je vois querant chi aval
.I. oisel a une sonnete.

Marote
Alés selonc cele haiete;
Je croi que vous le trouverés.
Tout maintenant i est alés.

Li chevaliers
Est, par amours?

Marote
Oïl, sans faille.

Li chevaliers
Certes, de l'oisel poi me caille,
S'une si bele amie avoie.

Marote
Pour Dieu, alez en vostre voie,
Car je sui en trop grant frichon.

Li chevaliers
Pour quoi?

Marote
Certes, pour Robechon.

Li chevaliers
Pour lui?

Marote
Voire, s'il le savoit,
Jamais nul jour ne m'ameroit,
Ne je n'aim rien tant comme Robin.

Li chevaliers
Vous n'avés garde de nului
Se vous volés a mi entendre.

Marote
Sire, vous nous ferés sousprendre.
Alés vous ent! Laissié me ester,
Car je n'ai a vous que parler.
Laissié me entendre a mes brebis.

Li chevaliers
Voirement sui je bien caitis
Quant je mec le mien sens au tien!

Marote
Si en alés; si ferés bien.
Aussi voi je chi venir gent.
J'oi Robin flagoler au flagieu d'argent,
Au flagieu d'argent.
Biau sire car vous en alés!

Li chevaliers
Bergerete et a Dieu remanés;
Autre forche ne vous ferai.
Ha! Mauvais vilains, mar i fai!
Pour coi tues tu cel faucon?
Qui te donroit .i. horion
Il aroit moult bien esploitié?

Robins
Ha, sire, vous feriés pechiét.
J'ai grant paor que il ne m'escape.

Li chevaliers
Tien de loier ceste souspape,
Quant tu le manies si gent!

Robins
Hareu! Diex! Hareu, bonne gent!

Li chevaliers
Fais tu noise? Or tien che tatin!

Marote
Sainte Marie! J'oi Robin!
Je croi que il soit la entrepris.
Anchois perdroie mes brebris
Que je ne l'alaisse aidier.
Lasse! Je voi le chevalier!
Je croi que pour moi l'a batu.
Robin, dous amis, que fais tu?

Robins
Certes, douche amie, il m'a mort.

Marote
Par Dieus, sire, vous avés tort
Qui ensi l'avés deskiré.

Li chevaliers
Et comment a il atiré
Mon faucon? Esgrardés, bregiere!

Marote
Il n'en set mie la maniere.
Pour Dieu, sire, or li pardonnés!

Li chevaliers
Volontiers, s'aveuc moi venés.

Marote
Je non ferai.

Li chevaliers
Si ferés voir,
N'autre amie ne voeil avoir,
Et voeil que chis chevaus vous porte.

Marote
Certes dont me ferés vous forche.
Robin, que ne me resqueus tu?

Robins
Ha! Las! Or ai jou tout perdu!
A tart i venront mi cousin!
Je perc Marot, s'ai un tatin,
Et desquiré cote et sercot!

Baudons
Hé! Resveille toi Robin,
Car on en maine Marot, car on en maine Marot.

Robins
Baudoul! Gautier, estes vous la?
J'ai tout perdu, Marote en va!

Gautiers
Et que ne l'alons nous secorre?

Robins
Taisiés! Il nous couroit ja seure
S'il en i avoit .iii. chens.
C'est uns chevaliers hors du sens,
Si a une si grant espee!
Il me donna si grant colee
Que je le sentirai grant tans.

Gautiers
Se g'i fusse venus a tans,
Il i eüst eü merlee!

Robins
Or esgardons leur destinee,
Par amours, si nous embuissons
Tout troi derriere ces buissons;
Car je voeil Marion resqueurre
Si le m'aiderez a sequeurre.
Li cuers m'est .i. peu revenus.

Marote
Biau sire, traiés vous ensus
De moi; si ferés grant savoir.
Li chevaliers
Demisele, non ferai voir;
Ains vous en menrai aveuc moi,
Et si arés je sai bien coi.
Or ne me soiiés plus si fiere!
Pren suer cest oisel de riviere
Que j'ai pris. Si en mengeras.

Marote
J'ai plus chier mon froumage cras,
Et men pain a mes bonnes poumes
Que vostre oisel a tout les plumes;
Ne de rien ne me poés plaire.

Li chevaliers
Qu'est che? Ne porrai je dont faire
Chose qui vous viengne a talent?

Marote
Sire, sachiés certainement
Que nenil; riens ne vous i vaut.

Li chevaliers
Bergiere, et Diex vous consaut!
Certes voirement sui je beste
Quant a ceste beste m'areste!
A Dieu, bergiere.

Marote
A Dieu, biau sire.
Lasse! Or est Robins en grant ire,
Car bien me cuide avoir perdue.

Robins
Hou, hou!

Marote
Dieus, est il ce qui la hue!
Robin?

Robins
Marote?

Marote
Dous amis, comment te vait?

Robins
Marote, je sui de bon hait,
Et tous garis puis que te voi.

Marote
Vien donques cha, acole moi.

Robins
Volentiers, suer, puis qu'il t'est bel.

Marote
Esgarde de cest sosterel
Qui me baise devant le gent!

Gautiers
Marot, nous sommes tuit parent;
Onques ne vous doutés de nous.

Marote
Je ne le di mie pour vous,
Mais il par est si soteriaus
Qu'il en feroit devant tous chiaus
De no vile autretant comme ore.

Robins
Ba qui s'en tenroit?

Marote
Et encore!
Esgardez comme est reveleus!
Robin, tu ies moult corageus.
Mais li cose est bien alee,
De legier doit estre ouvliee,
Ne nus ni doit apres entendre.

Robin
Si nous couvient Huart atendre
Et Peronnele qui venront.
Oez les chi!

Marot
Voirement sont.

Robin
Di, Huart, as tu te chievrete?

Huars
Oïl.

Marote
Bien veingnez vous, Perrete!

Perrote
Marote, Dieus te beneïe!

Marote
Tu as esté trop souhaidie.
Or est il bien tans de canter:
En si bonne compaignie
Doit on bien joie mener.

Baudons
Somme nous ore tout venu?

Huars
Ouil voir. Or pourpensons un jeu.
Veus tu as Roys ou as Roïnes?
Mais des jeus c'on fait as estrines,
Entour le veille du Noël.
A saint Coisne?

Robins
Je ne voeil el.

Marote
C'est vilains jeus; on i cunkie.

Peronnele
Marote, si ne riés mie.

Marote
Et qui le nous devisera?

Baudons
Jou, trop bien. Quiconques rira
Quant il ira au saint offrir,
Ou lieu saint Coisne seu.
Et qui en puist avoir, s'en ait.

Gautiers
Qui le sera?

Baudoil
Jou.

Gautier
C'est bien fait.

Huart
Gautiers, offrés premierement.
Tenés, saint Coisne, che present,
Et se vous en avés petit,
Tenés.

Perrete
Hé, il le doit! Il rit!

Marote
Certes c'est drois.

Huars
Qui le doit? Gautiers li Testus.

Marote
Tenés, saint Coisnes, biaus dous sire.

Robins
Diex, com ele se tient de rire!
Qui va apres? Perrote, alés!

Peronnele
Biau sire, sains Coisnes, tenés;
Je vous aporte che present.

Robins
Tu te passes et bel et gent.
Or sus, Huart, et vous, Baudon.
Tu ris, ribaus, dont tu le dois!

Baudons
Non fach! Huart apres! Je vois.

Huars
Ves chi deus mars. Vous le devés.
Or tout coi, point ne vous levés,
Car encore n'ai je point ris.

Robins
Qu'est ce, Huart? Est chou estris?
Mau soiiés vous ore venus!
Tu veus tous jors estre batus.
Or le paie tout sans deignier.

Huars
Je le voil volentiers paier.

Robins
Tenés, sains Coismes, est ce plais?

Marote
Ho! Singneur, chis jeus est trop lais;
En est, Perrete?

Peronnele
Il ne vaut nient.
Et sachiés que bien apartient
Que faisons autres festeletes.
Nous sommes chi .ii. baisseletes
Et vous estes entre vous .iiii.

Gautiers
Faisons .i. pet pour nous esbatre;
Je n'i voi si bon.

Robins
Fi, Gautier!
Savés si bel esbanoiier
Et devant Marote m'amie
Avés dit si grant vilenie?
Maudehais ait par le musel
A cui il plaist n'a qui est bel!
Or ne vous aviegne jamais!

Gautiers
Je le lairai pour avoir pais.

Marote
Or faisons .i. jeu.

Robin
Quel vieus tu?

Marote
Je voeil, o Gautier le Testu,
Jouer as Rois et as Roïnes.

Gautiers
Et je ferai demandes fines
Se vous me volés faire roy.

Robin
Nenil, sire, foi que vous doi;
Ains ira au nombre des mains.

Huart
Certes, tu dis bien, biaus compains,
Et chieus qui chiet en .x. soit rois.

Baudons
C'est bien, de nous li otrois.
Or cha! Metons nos mains ensanle.

Robin
Sont eles bien? Que vous en sanle?
Li quiex commenchera?

Huars
Gautiers.

Gautier
Je commencherai volentiers.
Empreu.

Huars
Et deus.

Baudoul
Et trois.

Robin
Et quatre.
Conte apres, Marot, sans debatre.

Marote
Trop volentiers: et v. et .vi.
Et .vii. et .viii. et .ix. et .x.

Baudons:
Enhenc, biau seigneur, je sui rois!

Marote
Par le mere Dieu, chou est drois,
Et nous tous, ce croi, le volons.
Levons le haut et couronnons!
Ho, bon est!

Robins
Hé, Perrete, en quar me donne,
Par amours, en lieu de couronne
Au roi ton capel de festus.

Peronnele
Tenés, roi.

Baudoul
Gautiers li Testus,
Venés a court tantost, venés!

Gautiers
Volentiers, sire. Commandés
Tel cose que je puisse faire,
Et qui ne soit a moi contraire.
Je le ferai se j'onques puis.

Le roi parle
Gautier, premierement te ruis
Que tu dies ci devant nous:
S'onc fus de t'amie jalous.
Et puis s'apelerai Robin.

Gautiers
Oïl, sire, pour .i. mastin
Que j'oïs hurter l'autre fie
A l'uis de le cambre m'amie;
Si en soupechonnai .i. home.

Le roi parle
Or sus, Robin!

Robins
Rois,
Commande moi che qu'il te plaist.

Li rois
Robin, quant une beste naist,
A coi sés tu qu'ele est femele?

Robins
Ceste demande est bonne et bele!

Li rois
Dont i respon!

Robins
Non ferai voir!
Mais se vous le volés savoir,
Sire rois, au cul li wardés.
Ja plus de moi n'en porterés.
Me cuidiés chi faire honte?

Marote
Il a droit, voir.

Li rois
A vous que monte?

Marote
Si fait car li demande est laide.

Li rois
Marot, et je voeil qu'il souhaide
Son voloir.

Robins
Je n'os, sire.

Li rois
Non?
Va, dont s'acole Marion,
Bien douchement si que il li plaise.

Marote
Esgar dou sot, s'il ne me baise!

Robins
Certes, non fac.

Marote
Vous i mentés.
Encore i pert il; esgardés!
Je cuit qu'il m'ait morse el visage.

Robins
Je cuidai tenir .i. froumage,
Si te senti je tenre et mole.
Vien avant, seur, et si m'acole
Par pais faisant.

Marote
Va a dyable sos!
Tu poises autant comme .i. blos!

Robins
Or, de par Dieu! Vous vous courchiés?
Venés cha, si vous rapaisiés.

Marote
Biau sire, je ne dirai plus.
N'en soiés honteus ne confus.

Le roi parle
Venés a court, Huart, venés.

Huars
Je voiss puis que vous le volés.

Li rois
Or di, Huart, si t'aït Diex,
Quel viande tu aimes miex.
Je sai bien se voir m'en diras.

Huars
Bon fons de porc pesant et cras
A le fort aillie de nois.
Certes, j'en mengai l'autre fois
Tant que j'en oi la menison.

Le roi parle
O Diex, con faite venison!
Huars n'en diroit autre cose.
Perrete, vien a court!

Perrete
Je n'ose.

Le roi parle
Si feras, si Perrete. Or di,
Par cele fois que tu dois mi,
Le plus grant joie c'ainc eüsses
D'amours, en quel que lieu que fusses.
Or di, et je t'escouterai.

Perrete
Sire, volentiers le dirai.
Sire ce que mes amis vint
A moi aus chans et si me tint
Longuement bonne compaignie
Lés mes brebis, sans vilenie,
Pluseurs jors menu et souvent.

Le roi parle
Sans plus?

Perrete
Voire, voir!

Le roy
Ele ment.

Robins
Par le cors Dieu, je le croi bien.

Le roi parle
Marote, or sus, vien a court, vien.

Marote
Faites moi dont demande bele.

Le roi parle
Volentiers. Di moi, Marotele,
Combien tu aimes Robinet,
Men cousin, che joli varlet.
Honnie soit qui m'en mentira!

Marote
Par foi, je n'en mentirai ja.
Je l'aim, sire, d'amour si vraie
Que je n'aim tant brebis que j'aie,
Nis cheli qui a aignelé.

Le roi
Par le saint Dieu, c'est bien amé!
Je voeil qu'il soit de tous seü.

Gautiers
Marote, il t'est trop meskeü!
Li leus emporte une brebis!

Marote
Robin, ceur i tost, biaus amis,
Anchois que li leus le mengüe!

Robins
Gautier, prestés moi vo machue;
Si verrés ja bacheler preu.
Hareu! Le leu, le leu, le leu!
Sui je li plus hardis qui vive?
Tien, Marote.

Marote
Lasse, caitive!
Commme ele revient dolereuse

Robins
Mais esgar comme ele est croteuse!

Marote
Et comment tiens tu chele beste?
Ele a son cul devers le teste.

Robins
Ne puet caloir; che fu de haste
Quant je le pris. Marote, or taste
Par ou li leus l'avoit aierse.
Mais esgar comme ele est chi perse.

Gautiers
Gautier, com vous estes vilains!

Robins
Marote, tenés le en vos mains,
Mais wardés bien qu'el ne vous morde.

Marote
Non ferai, car ele est trop orde;
Mais laissié le aler pasturer.

Huars
Sés tu de quoi je voeil parler,
Robin? Se tu aimes autant
Marion, com tu fais sanlant,
Sachez je le te loëroie
A prendre, si Gautiers l'otroie.

Gautiers
Il m'est bel et je l'otroie.
Je le veill bien pren le donc.

Robin
Ce est tout mien?

Gautiers
Oïl, nus ne t'en fera tort.

Marote
Hé, Robin! Que tu m'estrains fort!
Ne sés tu faire belement?
C'est grans merveille qu'il ne prent
De ches deus gens Perrete envie.

Perrete
Cui? Moi? Je n'en ai nul en vie
Que jamais eüst de moi cure.

Huars
Si aroit, voire, par aventure.

Perrete
A cui?

Huart
A moi ou a Gautier.

Gautiers
Voire, sire, pour vo musete?
Tu n'as el monde plus vaillant.

Huars
Si ai au mains ronchi traiant,
Bon harnas charrete et carue,
Et si sui sires de no rue.
S'ai houche et sercot, tout d'un drap,
Et s'a me mere .i. bon hanap
Et une rente c'on li doit
Qui m'escherra s'elle moroit,
De grain seur .i. molin a vent,
N'a il en moi bon mariage?
Dites, Perrete?

Perrete
Oïl, Gautier,
Mais je n'oseroie acointier
Nului pour mon frere Guiot;
Bien en porroit tost venir bataille.

Gautiers
Si tu ne le veus, ne m'en caille.
Entendons a ces autres noches.
Di moi, c'as tu chi en ches botes?

Peronnele
Il i a pain, sel et cresson.

Gautiers
Et tu, as tu rien, Marion?

Marote
Naie, voir, demande Robin—
Fors du froumage d'ui matin,
Et du pain qui nous demoura.
Vés en chi se vous en volés.
Qui eüst deus gambons salés?
Ou sont il?

Gautiers
Vés les chi tous pres.

Huars
Et jou ai deus froumages fres.

Marot
Di, de quoi sont il?

Huart
De brebis.

Baudon
Segneur, et j'ai des pois rotis.

Marote
Quides tu pour tant estre quites?

Robins
Naie, encor ai je des poumes quites.
Marion, en veus tu avoir?

Marote
Nient plus?

Robins
Si ai.

Marote
Or di dont voir.

Robins
Encore ai je .i. tel pasté,
Qui est de coulon tubé,
Que nous mengerons, Marote,
Bec a bec et moi et vous;
Chi me ratendés, Marote,
Chi venrai parler a vous.
Marote, veus tu plus or di?

Marote
Oïl, certes.
Et une vake qui nous rent
Le jour assés lait et froumage.
N'a il en moi bon mariage?
Dites, Perrete?

Robins
Et jou te di—
Qu'encore ai je un tel capon
Qui est cras seur le crepon,
Que nous mengerons, Marote,
Bec a bec et moi et vous;
Chi me ratendés, Marote,
Chi venrai parler a vous.

Marote
Robin, revien dont tost a nous.

Robin
Ma douche amie, volentiers.
Et si mengiés endementiers
Que g'irai; si ferés que sage.

Marote
Robin, nous feriemmes outrage.
Saches que je te voeil atendre.

Robins
Non feras, mais fai chi estendre
Ten jupel en lieu de touaille,
Et si metés sus vo vitaille,
Car je revenrai tout errant.

Marote
Met ten jupel, Perrete, avant;
Aussi est il plus blans du mien.

Peronnele
Certes, Marot, je le voeil bien,
Puis que vo volentés i est.
Tenés et vés le chi tout prest.
Estendé ou vous le volés.

Marote
Or cha, biau segnieur, aportés,
S'il vous plaist, vo viande cha.

Peronnele
Esgar, Marote, je voi la,
Che me samble, Robin venant.
C'est mon, et si vient tout balant.
Que t'en sanle? Est il grans caitis?

Peronnele
Certes, Marot, il est faitis,
Et de faire a ton gré se paine.
Esgar les corneurs qu'il amaine!

Marot
Ou sont il?

Perrete
Vois tu ches varlés
Qui la tienent ches .ii. cornés?

Marote
Par le saint Dieu, je les voi bien.

Robins
Marote, je sui venus—tien!
Or di, m'aimes tu de bon cuer?

Marote
Oïl, voir.

Robins
Tres grant merchis, suer,
De che que tu pas ne t'escuses.

Marote
Hé, que sont che las?

Robins
Che sont muses
Que j'ai pris en chele vilete.
Suer, esgar quel bele cosete!

Marote
Robin, par amours, sié te cha,
Et chil compaignon seront la.

Robins
Volentiers, douce amie chiere.

Marote
Tien che morsel, biaus amis dous.
Hé! Gautier, a quoi pensés vous?

Gautiers
Certes, je pensoie a Robin,
Car se nous ne fuissons cousin,
Je t'eüsse amee sans faille,
Car tu es de trop bonne taille.
Baudon, esgar quel cors chi a!

Robins
Gautier, ostés vos mains de la!
En est che mie vo amie.

Gautiers
En est tu ja en jalousie?

Robins
Oïl, voir!

Marote
Robin, ne te doute.

Robins
Encore voi je qu'il te boute!

Marote
Gautier, par amours, soiés cois;
Je n'ai cure de vo gabois.
Mais entendons a nostre feste.

Gautiers
Je sai trop bien canter de geste.
Me volés vous oïr canter?

Robin
Oïl.

Gautiers
Fai moi dont escouter
Audigier, dist Raimberge, bouse vous di.

Robins
Ho! Gautier, je n'en voeil plus—fi!
Dites, serés vous tous jours teus?
Vous chantez com ors menestreus.

Gautiers
[En mal eure] gabe cis sos
[Qui me va blamant mes bi]aus mos.
N'est che mie bele canchons?

Robins
Nennil, voir.

Marot
Par amours, faisons
Le tresque et Robins le menra,
S'il veut, et Huars musera,
Et chil doi autre corneront.
Or ostons ains ches coses dont.
Par amour, Robin, or le maine.

Robins
Hé, Dieus! Com tu me fais de paine!

Marote
Or fai, dous amis, je t'acole.

Robins
Et tu verras passer d'escole
Pour chou que tu m'as acolé.
Mais nous arons anchois balé,
Entre nous deus, car bien balons.

Marote
Soit, puis qu'il te plaist; or alons,
Et si tien le main au costé.
Dieu, Robin,, que c'est bien balé!

Robins
Marotele,
Certes! Tous li cuers me sautele,
Que je te voi si bien baler.
Or voeil jou le treske mener.

Marote
Voire, pour Dieu, mes amis dous.

Robins
Or sus, biau segneur, levés vous!
Si vous tenés, g'irai devant.
Marote, preste moi ton gant,
S'irai de plus grant volenté.

Marot
Dieu, Robin, que ch'est bien passé!
De trestous dois avoir le los.
Par amors mainne nous au bos.

Robins
Venés apres moi, venés le sentele,
Le sentele, le sentele, lés le bos.

Explicit de Robin et de Marion