Biaux Guillebert, dites, s'il vous agree,
Respondez moi a ce que vous demant :
Un chevalier a une dame amee
Et si vous di qu'il en est si avant
Que nuit et jour fait de li son commant,
Tant a Amours la dame abandonnee ;
Dites s'amours vont pour ce defaillant.

Dux de Brebant, ja orrez ma pensee :
Ja li amour n'ira pour ce faillant,
Ains en seroit en loial cuer doublee,
S'on li faisoit bonté et bel samblant ;
Se la dame est donnee a son amant,
Ja ne sera de lui fors mieus amee,
S'en son cuer a point de bonté manant

He! Guillebert, ou avez vous trouvee
Ceste raison? Trop vous voi nonsachant.
On tient plus chier la chose desiree
Que ce c'on a abandonneemant.
Or ne m'alez pas de ce reprenant :
Tant est Amours servie et honnoree
Que la dame se garde sagement.

Dux, j'ai moult bien vo raison escoutee,
Mes vous failliez trop merveilleusement.
Quant mieus me fait Amours et mieus m'agree,
Et mieus la serf et plus m'en truis en grant.
Assez moustrez le vostre couvenant :
Tost avrïez vostre amie oublïee ;
Je li lo bien qu'ele vous maint tendant.

He! Guillebert, or est fole prouvee,
S'en vo merci ne se met maintenant !
Quant on fait tant que sa dame est gabee,
Dites vous dont c'on aime plus formant?
N'est mie amours ou l'en va mal querant,
Dont sa dame porroit estre blasmee.
Nulz ne le fet qui aime loiaument.

En non Dieu, Dux, ce est chose passee :
Ja ne crerrai qu'il soit si faitement
Que pour bonté soit dame refusee,
Ains la doit on amer mieus que devant.
Or nous metons en loial jugement,
S'iert la ten}cons de nous deus afinee,
Que li estris dure trop longuement.

Guillebert, soit! J'en preng a mon garant
Le bon Raoul de Soissons, qui sevree
Ne fist d'Amours nul djor de son vivant.

Dux, et je preng le bon conte vaillant,
Celui d'Anjou; la chose est bien alee,
Quar cil dui sont de bon entendemant.