JACQUES DE CAMBRAI
etrowange novelle
Chanson pieuse

Retrowange novelle
Dirai et bone et belle
De la virge pucelle,
Ke meire est et ancelle
Celui ki de sa chair belle
Nos ait raicheteit
Et ki trestous nos apelle
A sa grant clairteir.

Ce nos dist Isaïe
En une profesie :
D'une verge delgie,
De Jessé espanie,
Istroit flors per signorie
De tres grant biaulteit.
Or est bien la profesie
Torneie a verteit.

Celle verge delgie
Est la virge Marie ;
La flors nos senefie
De ceu ne douteis mie,
Jhesu Crist, ki la haichie
En la croix sousfri;
Fut por rendre ceays en vie
Ki ierent peri.